ضرورى لما تقرر تنزل فى الوزن تتأكد انك بتنزل بطريقه صح، طيب ازاى ؟
لازم تفهم وتحترم طريقه النزول في الوزن، فلو انت ماشي صح سواء لوحدك أو مع دكتور شاطر ومتخصص …فمش هاتكون حاسس انك تعبان و مرهق معظم الوقت، وكمان هتلاقى نفسك عندك طاقه ولياقه بدنيه هايله وكمان شعرك مش بيقع وبشرتك نضره وحتى مش هتحتاج مكملات غذائيه لأنك ماشى على نظام غذائي صحى ومتوازن ،طيب لو بتنزل في الوزن بطريقه غلط للأسف ممكن يحصل (Dyslipidemia)
يعنى ببساطه وجود كميات غير طبيعيه من الكوليسترول أو الدهنيات فى الدم بسبب اتباع أنظمة غذائية خاطئة ونمط حياة قليل الحركة (sedentary lifestyle)
وممكن كمان يحصل fatty liverيعني كميه دهون كبيره متخزنه فى خلايا الكبد وممكن كمان over loadتحميل على الكلى حتى للاسف فى ناس بتوصل ل coma يعنى غيبوبه
ضرورى نحترم ونراعى نظام الجسم فبلاش فهلوه وتسرع لان كده ممكن تضر نفسك جامد .
فلنفترض ان الاكل هو البنزين بتاع الجسم فالجسم هايستخدم الاكل ويحوره لغايه ما يطلع منه طاقه وحاجات تانى فلو نظام الاكل بتاعك حلو و صحى فالجسم هايطلع طاقه وحاجات مفيده، انما لو اكلك غير صحى للاسف الجسم هايطلع حاجات تانيه مش حلوه خالص .
مفيش دايت مناسب للكل ماتاخدش دايت من على النت وتمشي عليه وخلاص فى عوامل كتير بتختلف من شخص للتانى .